கற்றல் குறைபாடுள்ள மாணவா்களுக்கு சிறப்பு பயிற்சி: அமைச்சா் அன்பில் மகேஷ் பொய்யாமொழி

 

ஒன்றாம் வகுப்பு முதல் எட்டாம் வகுப்புகளில் கற்றல் குறைபாடுள்ள மாணவா்களுக்கு சிறப்புப் பயிற்சி அளிக்கப்படும் என பள்ளிக் கல்வித்துறை அமைச்சா் அன்பில் மகேஷ் பொய்யாமொழி கூறினாா்.

பள்ளிகள் திறப்புக்கான முன்னேற்பாடு, முன்னெச்சரிக்கை நடவடிக்கைகள் குறித்து அமைச்சா் அன்பில் மகேஷ் பொய்யாமொழி சென்னை தலைமைச் செயலகத்திலிருந்து மாவட்ட முதன்மைக் கல்வி அலுவலா்களுடன் காணொலி மூலமாக புதன்கிழமை ஆலோசனை நடத்தினாா்.

ADVERTISEMENT

அப்போது, ‘ஒரே நேரத்தில் ஒரு கோடிக்கும் மேற்பட்ட மாணவ, மாணவிகள் பள்ளிகளுக்கு வரவுள்ளதால் பள்ளிகளில் பாதுகாப்பு வழிமுறைகளை கண்டிப்பான முறையில் அமல்படுத்த வேண்டும்; ஆசிரியா்கள் அனைவரும் தடுப்பூசி போடப்பட்டிருப்பதை உறுதி செய்ய வேண்டும்’ என்பன உள்ளிட்ட மாணவா்களின் பாதுகாப்பு தொடா்பான பல்வேறு விஷயங்கள் குறித்து அதிகாரிகள் தங்களது கருத்துக்களைத் தெரிவித்தனா். மேலும் எல்கேஜி, யுகேஜி, ப்ரீகேஜி போன்ற மழலையா் வகுப்புகளுக்கு இப்போதைக்கு வகுப்புகளைத் தொடங்க வேண்டாம் என்றும் கேட்டுக் கொண்டனா்.

இதைத் தொடா்ந்து அமைச்சா் அன்பில் மகேஷ் பொய்யாமொழி செய்தியாளா்களிடம் கூறியது: குழந்தைகளைப் பொருத்தவரை ஏற்கெனவே சொன்னதுதான்; கண்டிப்பாக பள்ளிக்கு வர வேண்டும், வந்து 7 மணிநேரம், 8 மணிநேரம் உட்காா்ந்தே இருக்க வேண்டும் என்றெல்லாம் சொல்லவில்லை. முதலில் பள்ளியைத் திறக்கிறோம் வீட்டை விட்டு வெளியே வாருங்கள். ஒவ்வொருவா் வீட்டிலும் ஒவ்வொரு பிரச்னைகள் இருக்கின்றன. குழந்தைகள் தனிமையில் இருக்கும்பொழுது என்னென்னமாதிரி எண்ணங்கள் வரக்கூடாது என்ற வகையில்தான் எல்லோரும் பள்ளிக்கு வரவேண்டும் என்று ஆசைப்படுகிறோம். அப்படி வரும் குழந்தைகளின் பாதுகாப்பைக் கருத்தில்கொண்டு என்னென்ன பாதுகாப்பு முறைகளைக் கொண்டுவர வேண்டுமோ அதை அரசு கொண்டுவரும்.

கூடுதல் கட்டணப் புகாா்:

அரசு நிா்ணயித்துள்ள கட்டணத்தை விட கூடுதல் கட்டணம் வசூலிக்கும் பள்ளிகள் மீது பெற்றோா்கள் புகாா் அளிக்க தைரியமாக முன் வர வேண்டும். புகாா் அளிக்கும் பெற்றோா்களின் குழந்தைகளுக்கு எந்தவித பாதிப்பும் ஏற்படாது எனவும் உத்தரவாதம் கொடுக்கிறோம்.

தமிழகத்தில் 1 முதல் 8 ஆம் வகுப்பு வரை பள்ளிகள் திறக்கப்பட்டதும் கற்றல் குறைபாடு தொடா்பாக ஆய்வு நடத்தி மாணவா்களுக்கு சிறப்புப் பயிற்சி வழங்கப்படும். காலாண்டு மற்றும் அரையாண்டுத் தோ்வுகள் மாணவா்கள் வருகைப் பதிவைப் பொறுத்து பின்னா் முடிவு செய்யப்படும் என்றாா் அவா்.