ராஜஸ்தானில் இருந்து 2000 மாணவர்கள் வீடு திரும்ப ஏற்பாடு : மேற்கு வங்காளம்

கொல்கத்தா: ராஜஸ்தான் மாநிலம், கோட்டாவிலிருந்து தங்களது மாநிலத்தைச் சோ்ந்த 2,368 மாணவா்களை பேருந்துகள் மூலம் மேற்கு வங்க அரசு மீட்டு வருகிறது.

இதுகுறித்து மேற்கு வங்க உள்துறைச் செயலா் ஆலாபன் பந்தோபாத்யாய
வியாழக்கிழமை சுட்டுரையில் பதிவிட்டதாவது:

மேற்கு வங்கத்தைச் சோ்ந்த மாணவா்கள் ராஜஸ்தானின் கோட்டா நகரில் தங்கி பொறியியல் மற்றும் மருத்துவம் பயின்று வருகின்றனா். அவ்வாறு சென்றவா்கள் ஊரடங்கு காரணமாக அங்கு சிக்கித் தவித்து வந்தனா். அந்த நகரில் இருக்கும் சுமாா் 2,368 மாணவா்களை மீட்பதற்கான முயற்சிகள் மேற்கொள்ளப்பட்டன.

அதன் பேரில் தற்போது மாநில அரசு ஏற்பாடு செய்த 95 பேருந்துகள் மூலம் அழைத்து வரப்படும் அவா்கள் மேற்கு வங்கத்தை வெள்ளிக்கிழமை வந்தடைவாா்கள் என்று எதிா்பாா்க்கப்படுகிறது.
அவா்கள் மேற்கு வங்க அரசு அதிகாரிகளின் பாதுகாப்பில் அழைத்து வரப்படுகின்றனா் என்று ஆலாபன் பந்தோபாத்யாய கூறியுள்ளாா்.

முன்னதாக, ராஜஸ்தானில் சிக்கியிருக்கும் மேற்கு வங்க மாணவா்களை மீட்பதற்கான நடவடிக்கைகள் எடுக்கப்பட்டு வருவதாகவும், அவா்கள் விரைந்து மாநிலம் திரும்புவாா்கள் என்றும் முதல்வா் மம்தா பானா்ஜி கடந்த திங்கள்கிழமை கூறியிருந்தது குறிப்பிடத்தக்கது.